Skráning er hafin í Lífshlaupið 2018

17.01.2018

Skráning er hafin í Lífshlaupið 2018 - landskeppni í hreyfingu, og verður hún ræst í ellefta sinn miðvikudaginn 31. janúar næstkomandi. Vinnustaðakeppnin stendur frá 31. janúar - 20. febrúar og grunnskóla- og framhaldsskólakeppnin frá 31. janúar - 13. febrúar.

Það er því um að gera að fara að skrá sig og huga að því hvað vinnustaðurinn eða skólinn getur gert til þess að virkja sem flesta til þátttöku. Að sjálfsögðu er hægt að notast áfram við sitt notendanafn frá fyrri keppnum og um að gera að hafa samband ef einhver vandkvæði koma upp varðandi það.

Við vekjum athygli á því að ekki þarf að skrá inn vinnustaði frá síðustu keppni og þá má alla finna á flettilistanum í skrefinu "Ganga í lið" eða "Stofna lið". Endilega athugið hvort ykkur vinnustaður sé ekki örugglega skráður áður en þið stofnið nýjan. Hins vegar þarf að stofna inn ný keppnislið undir vinnustaðnum.

Sama á við um grunn- og framhaldsskólana. Allir skólar landsins ættu að vera í flettilistanum en þó þarf að stofna inn bekkina aftur. Það má gera á auðveldan hátt með excel innlestri.

Allar upplýsingar má nálgast hjá Íþrótta- og Ólympíusambandi Íslands í síma 514-4000 eða með fyrirspurn á netfangið lifshlaupid@isi.is

Við bendum einnig á Facebook-síðu Lífshlaupsins og einnig Instagram-síðuna.