Verðlaunaafhending Lífshlaupsins 2018 fór fram í dag

23.02.2018

Fulltrúar frá vinnustöðum, grunn-, og framhaldsskólum tóku á móti sínum verðlaunum í hádeginu í dag á verðlaunaafhendingu Lífshlaupsins 2018 sem fór fram í sal KSÍ við Laugardalsvöll. Góð þátttaka var í Lífshlaupinu í ár en um 16.000 manns á öllum aldri voru virkir þátttakendur á 505 vinnustöðum, í 29 grunnskólum og 14 framhaldsskólum. Þá voru skráðar um 13 milljónir hreyfimínútna á keppnistímanum og yfir 166 þúsund dagar með lágmarksviðmiði sem verður að teljast gott miðað við válynd veður sem hömluðu keppendum þennan febrúarmánuð.

 

Mætingin á verðlaunaafhendinguna í dag var stórgóð og salurinn þéttskipaður. Gaman er að sjá hversu margir vinnustaðir og skólar eru duglegir að taka þátt í verkefninu ár eftir ár með flottum árangri. Lífshlaupið er orðið að vinnustaða-/skólamenningu á mörgum þeirra staða sem skara fram úr og vinnustaðir og skólar eru duglegir að skapa sínar eigin innanhúshefðir í kringum Lífshlaupið.

Þau fyrirtæki og þeir skólar sem höfðu ekki tök á því að vera með okkur fá verðlaunaplattann sendan til sín í næstu viku og myndir af verðlaunaafhendingunni birtast von bráðar á myndasíðu ÍSÍ.

Um leið og við óskum sigurvegurum til hamingju með árangurinn, þökkum fyrir frábæra þátttöku og hvetjum alla til að halda áfram að hreyfa sig og nota vefinn til þess að halda utan um sína hreyfingu. Einstaklingskeppni Lífshlaupsins er í gangi allt árið og gefst þátttakendum kostur á að vinna sér inn brons-, silfur-, gull-, og platínumerki eftir að hafa náð ákveðnum fjölda daga í hreyfingu.